Lean dávjjibut ja dávjjibut álgán smiehttat mii dat lea mii mearrida guđe gillii olbmot bloggejit, ja earenoamážit go sápmelaččat/sámegielagat bloggejit. Leat oalle ollu sápmelaččat mat bloggejit, earenoamážit nuorat. Muhtin bloggaid čuovun dássedit, earáid guovlalan duollet dálle, ja muhtimiid lean dušše muhtomin lohkan, go lean deaivan guovlalit dan bloggai.
Bloggat maid leat oalle máŋggaláganat: árgabeaivvi birra, eallima birra ja smiehttamušat eallima birra, politihka birra, fitnuideaset birra. Lea dušše okta bloggenfáddá mii lea oalle dábálaš goit Norgga bealde, man birra in leat báljo gávdnan sápmelaččaid bloggain, fágadidaktihkka.
Máŋgii boahtá ge jurdda manne nu máŋggas vállljejit čállit dáro/ruoŧa/suomagillii ovdal go sámegillii. Na dien suomagiela in dieđe, go in máhte dan mađege ahte máhtán lohkat ja ipmirdit sisdoalu. Dan dihte maid in dieđe leat go sápmelaččat geat čállet vai earát. Duođasge in dieđe eará suomabeale blogga go Sámedikki ságadoalli, dan dihte go son čállá maiddái davvisámegillii.
Mii dat lea dasto mii mearrida guđege čállingiela válljema? Manne válljejit čállit sámegillii, dárogillii/ruoŧagillii, suomagillii dahje vaikko ruoššagillii? (In dieđe leat go nu galle eará sápmelačča go Rauna Kuokkanen gii čállá eará gielaide. Duohtavuođas in leat gillen iskat.) Mearrida go dat ahte geaidda guhtege čállá? Geaid sii dáhttot oláhit iežaset čállosiiguin? Movt dát váikkuha sin giellaválljema?
Sámepolitihkkárat gal dieđusge háliidit joksat iežaset válljejeddjiid, ja go dilli lea nu ahte eai buohkat hálddaš buot sámegielaid, de válljejit giela man buohkat ipmirdit. Vai? Dien dáfus gal Klemetti Näkkäläjärvi bargá nu go sárdnida. Son čállá iežas blogga guovtti giillii vaikko lea eambbo bargu. Ja diesa gal liikon. Jus galgá vuoruhit sámegiela, de ferte daguiguin maid dán čájehit.
Muhto naba earát? Movt sii leat válljen giela? Manne leat válljen nu go leat válljen?
Ja manne mun dán smiehtan???
Ná in gal dieđus buot sámegielbloggáriid sáhttán vástidit, muhto goit iežan ovddas.
SvarSlettMus leat guokte blogga, sámegillii ja nubbi fas ruoššagillii. Sámegielbloggas eanaš áigi čálán váikko man birra. Eallima birra, muhtumin politihka birra. Muhto fuobmájin ahte maŋimuš áiggit lean unnán čállán politihkalaš dáhpahusaid birra. Muhto dehálaš lea ahte geahčalan goit čállit sámegiela vai giella ovdanivččii. Ja sámegielbloggas mus eai lean goassige stuorra vuorddamušat ahte olbmot gal fertet čuovvut ja lohkat juohke ođđa čállosa.
Ruoššagielbloggas fas eanaš áigi mun lean čállán politihka birra ja sámi dáhpahusaid birra. Dál čálán sámiid birra, ja muhtin dáhpahusaid iežan eallimis. In gille gal šat ná ollu čállit politihka birra, go dán birra oalle máŋgasat čállet Ruošša bealde. Na juo, jus dá guoská sápmelaččaid, de gal buvttán iežan jurdagiid politihka birra. Ii leat beare gallis geat čállet sámiid birra Ruoššas. Ja dan oktavuođas mun oainnán ávki vaikko blogga bokte juohkit iešguđet lágan dieđuid sámiid birra.
Leaba somá go gávdnen dán du čállosa, seamma áššiid lean smiehttan čállingiela válljema birra. Somá livčče lohkat eambbo sámegielbloggaid, maiddái giela hárjehallama dihte ü
SvarSlett