Odne lean viimmat garrestan lohkagoahtit J.A Friisa "Lappiske sprogprøver".
Orui oalle váivi lohkagoahtit go lea čállon dološmállet bustávaiguin. Daid lea munnje oalle stávemuš, orru manname hiljit go in leat nu hárjánan daid lohkat. Muhto go ollejin dan oassái mas dat "albma" girji álggii, de doppe ledje dat sámegielteavsttat čállojuvvon latinbustávaiguin. Dárogieljorgalus baicca gohtalašbustávaiguin.
Álggos leat muitalusat iešguđet guovlluin, earret eará Várjjatvuonas, Ohcejogas, Kárášjogas, Guovdageainnus, Ivvárstáđiin, ja Vefsnis. Muitalusat leat elliid birra, jiehtanasaid birra, meararávggaid birra. Loahpageahčen fas leat árvádusat ja sátnevádjasat. Áibbas loahpas lea alfabehtalaš sátnelistu.
Girji ii lean rievttimielde jurddašuvvon muitalusgirjin, muhto gielladokumentašuvdnan. Dan dihte lea čállojuvvon suopmana mielde. Muhtin sánit leat oaneheappot go čállingiela mielde livčče. Mu mielas lea buorre danin. Ovtta grammatihkalaš mihtilmasvuođa fuomášin. Friis lea juohkán kom.ml.-gehčosa (-guin) sierra máddagis dahje sánis. Diet livččii guorahallanveara ahte lea go juohke suopmanis dan dahkan, vai dušše muhtimiin.
Báhcen dušše imaštallat. Gii lea leamaš čálašan dien girjji mii lea digitaliserejuvvon? Gávdnojit loahppaoasis, sátnegirjeoasis. Lea muhtin dološ olmmoš gii lea čállán sámegielsániid ja dárogielčilgehusa. Dovddat go don giehtačállosa?
geahčalin lohkat dan girji. Lea oalle váttis, muhto hárjaneami mielde lea vejolaš sihke lohkat ja ipmirdit. Buorre go gávdno dakkár girjjiid dagitálahámiin.
SvarSlettJuo, dat han lea ge nu somá dainna Google books:ain. Doppe sáhttá gávdnat girjjiid maid beassá lohkat vaikko eai leat vilges suorbmafáhcat ja unna lanjažis muhtin museas hui guhkkin eret ruovttus :-)
SvarSlettFriis lea oainnat čállán dan suopmana mielde mii muitaleaddjis lea, ii leat standárda čállinvuohki. Dan dihte lea muhtin sajiid váddáseabbo ipmirdit sisdoalu. Earret eará leat muhtin suopmaniin hui oanehis 2.stávval, ja de lea Friis guođđán eret 2.stávvala vokála. Muhto gal dan hárjána lohkat go oanehaš lea lohkan.