Odne lean gávdnan ođđa sáni, dahje rievtti mielde boares sáni; vai lea go áigahaš sáni? Na, dien imaštallama gal ferten vuos guođđit, ja boahtit áššái.
Čalbmen sáni Konrad Nielsena sátnegirjjis go ledjen juoidá eará ohcame, ja dál juogadan sáni duinna. Jus dette DON dovddat sáni, ja máhtát munnje dan čilget dárkileappot.
Sátni lea gásttadat dahje nu go Nielsen čállá: gāstâdâk.
Dulkon ahte Konrad Nielsen oaivvilda ahte sátni adno dušše Guovdageainnu boazosámiid gaskkas, ja dat mávssášii: "vått værlag".
Vuođđosátni lea gástat. [sv. gas'tât].
Bealistan gal navddán dovdat oallemuddui boazosámiid dadjanmálliid, muhto dán sáni gal in leat goassege deaivan gullat.
Gástat (sv. gas'tât) fas mearkkašivččii "bli våt (ordet kan ikke brukes om klær man har på sig)". Nappo ahte olmmoš ja várra eará diŋggat, earret biktasat mat olbmos leat nalde, juogaládje njusket dahje láktet dahje debbot (?) Ii oro gal nu ahte lea njarvan, go dasa han fas lea eará sátni. MOVT dát gástan lea; go jus njuoská, ii bat de livčče sáhttán dušše atnit dieid eará sániid?
Ii das galle.
Dus sáhttá leat juoga mainna gástadat, namalassii gásttadas (KN sv. gāstâdâs) nu ahte dat maid leat gástadan šaddá gásttas.
Dasto han mis lea buohkain dát sátni gásta, go báhppa gásttaša máná. Lea go das maid juogalágan oktavuohta dien sátnái?
Die lea vissa sátni maid ferten jearahallat olbmuin. Soaittášii dus čilgehus?
Ja livččii go dát sátni man heivešii dálkedieđáhusas atnit?
PS! Ii ábut seaguhit sániin gastit, gasttihit dahje gasttáhat, go dat gal lea olbmodávda.
Duortnussámegielas lea gásttadat obba dábálaš sátni. Mikael Svonni sátnegirjjis gávdná dáid: gástadit- väta, fukta, ja gástat – bli våt, gásttadat – fuktig väderlek, ja vel gásttas- våt.
SvarSlettMuđui háliidan giitit du miellagiddevaš blogga ovddas.
Ollu giitu vástádusa ovddas! Somá go vástidit.
SvarSlettMun oainnat in dovdda dien sáni sisdoalu, ja livččii ge somá gullat ahte movt dat gástat lea eará njuoskan-sániid ektui. Movt dat juoga gástá: riššu go čáhci njeaiga, lea go njoarrásan njeaiga, lea go dat diŋga bunjoduvvon, vai lea go áimmus geassán dan gásttadasa? (Sullii dego debbon?)
Mun lean jurddašan ahte ferte čáhci leat dat mii njuoskada, go juo ilbmi/dálki sáhttá leat gásttadat.